काठमाडौं । सी जिनपिङ चिनियाँ राष्ट्रपतिको तेस्रो कार्यकालका लागि अनुमोदित भएका छन् । साथै उनले नयाँ टिमसमेत घोषणा गरेका छन् ।

चिनियाँ कम्युनिस्ट पार्टीको हालै सम्पन्न अधिवेशनले सीलाई महासचिवमा निर्वाचित गरेको थियो । चीनमा कम्युनिस्ट पार्टीको महासचिव निर्वाचित व्यक्ति नै राष्ट्रपति र सेना प्रमुख हुने प्रचलन छ ।

अब उनी आगामी पाँच वर्षसम्म यही पदमा रहनेछन् ।

एक दशकदेखि सत्तामा रहेका सी जिनपिङले तेस्रो पटक सत्तामा आएर दशकौंदेखि चल्दै आएको कीर्तिमान तोडेर इतिहास रचेका छन् ।

यसअघि चिनियाँ कम्युनिस्ट पार्टीका संस्थापक माओत्सेतुङको निधनपछि तेस्रो पटक कुनै नेता सत्तामा आउन सकेका थिएनन् ।

त्यसो त,  सन् १९८० पछि चीनमा सर्वोच्च पदमा १० वर्षको कार्यकाल कायम गरिएको थियो । तर जिनपिङलाई थप पाँच वर्ष सत्तामा राख्न यो नियम हटाइयो ।

तेस्रो कार्यकालका लागि राष्ट्रपति बनेका सीले नयाँ टिमसमेत घोषणा गरेका छन् ।