काठमाडौं । श्रीलंकाली क्रिकेटर दानुष्का गुणातिलके बलात्कार आरोपमा पक्राउ परेका छन् । उनलाई अष्ट्रेलियाको सिड्नीबाट पक्राउ गरिएको हो ।

क्रिकेट समीक्षक रेक्स क्लेमेन्टाइनले सामाजिक सञ्जालमार्फत गुणातिलके बलात्कार आरोपमा सिड्नीबाट पक्राउ परेको पुष्टि गरेका छन् ।

यसबारे एक विज्ञप्ति जारी गर्दै सिड्नी प्रहरीले एक महिलासँग कथित यौन दुराचारको आरोपमा श्रीलंकाली नागरिकलाई पक्राउ गरिएको जनाएको छ।

विज्ञप्तिमा कसैको नाम नखुलेको र चारवटा बलात्कार मुद्दामा पक्राउ परेको बताइएको छ ।

प्रहरीका अनुसार यी महिला विगत केही दिनदेखि अनलाइन डेटिङ एपमार्फत आरोपीसँग कुरा गरिरहेकी थिइन् । त्यसपछि दुवैको भेट भएको थियो । उक्त घटना आफूमाथि भएको महिलाले आरोप लगाएकी छन् ।

गुणातिलके तीन साताअघि घाइते भएका थिए । त्यसपछि एसेल बन्दाराले टोलीमा स्थान पाएका थिए । तर टिम व्यवस्थापनले उनलाई फिर्ता पठाउनुको सट्टा अष्ट्रेलियामै राखेको थियो ।