काठमाडौं । २२ औं फिफा विश्वकपको नेपालमा प्रत्यक्ष प्रसारण अन्योलमा परेको छ । सर्वोच्च अदालतको आदेशपछि मंसिर ४ गतेदेखि सुरु हुन गइरहेको विश्वकपको प्रत्यक्ष प्रसारण अन्योलमा परेको हो ।

मिडिया हबले फिफासँग नेपालका लागि प्रत्यक्ष प्रसारण अधिकार खरिद गरेको थियो । यस्तो अधिकार पाएसँगै उसले विश्वकपका ६४ खेल हेरेबापत दर्शकबाट ५०० रूपैयाँ उठाउने तयारी गर्दै बिक्री प्रक्रिया अघि बढाएको थियो । यसबारे परेको रिटमा सर्वोच्चले यथास्थितिमा राख्न अल्पकालीन आदेश दिएको छ ।

सर्वोच्चले कात्तिक ३० गते उपस्थित हुन मिडिया हबलाई भनेको छ । विश्वकप सुरु हुनुभन्दा चार दिनअगाडि बोलाइएकाले नेपालमा यसको प्रसारण अन्योलमा परेको हो ।