काठमाडौं । आसन्न प्रदेश तथा प्रतिनिधिसभा निर्वाचनमा २२ प्रतिशत कर्मचारी र सुरक्षाकर्मी मतदानबाट वञ्चित हुने भएका छन् । यो निर्वाचनमा समानुपातिकतर्फ सरकारी कर्मचारी र सुरक्षाकर्मीलाई मत जाहेर गर्ने प्रबन्ध मिलाइएको छ ।

निर्वाचन आयोगको तथ्यांकअनुसार निर्वाचनमा प्रत्यक्ष र अप्रत्यक्ष रूपमा खटिने सुरक्षाकर्मी र कर्मचारीको संख्या पाँच लाख ७६ हजार ६ सय ३१ छ । जसमध्ये चार लाख ४८ हजारको नामावली मात्रै अस्थायी मतदाता नामावलीमा समावेश भएको आयोगको भनाइ छ ।

यो कुल संख्याको ७७.६९ प्रतिशत हो । अर्थात् निर्वाचनमा खटिएकामध्ये २२.३८ प्रतिशत अर्थात् एक लाख २८ हजार ६ सय ३१ सुरक्षाकर्मी र कर्मचारी मतदान गर्नबाट वञ्चित हुनेछन् । किनकि, उनीहरूको नाम नै अस्थायी मतदाता नामावलीमा समावेश छैन ।