काठमाडौं । नयाँ सरकार गठन प्रक्रियाले मूर्तरूप लिएपछि धितोपत्र बजारले त्यसलाई स्वागत गरेको छ । धितोपत्र बजारमा सेयर कारोबार मापक नेप्से परिसूचक सोमबार उच्च अंकले वृद्धि भएको छ ।

नेपाल स्टक एक्सचेन्जका अनुसार सोमबारको कारोबारमा नेप्से परिसूचक ५६.८८ अंकले वृद्धि भई १ हजार ९२४ दशमलव शून्य नौ विन्दुमा पुगेको छ । यो दिनको कारोबारमा ठूला कम्पनीको कारोबारमा मापक सेन्सेटिभ परिसूचक ८.३८ अंकले उकालो लागेर ३७५.४५ मा पुगेको छ ।

नेप्सेका अनुसार कारोबार भएका कुल १३ उपसमूहमध्ये अन्य उपसमूहको मात्रै सेयर मूल्यमा गिरावट आएको छ ।

यस्तै १२ उपसमूहको सेयर मूल्य भने उकालो लागेको छ । कारोबार भएका कम्पनीमध्ये २०३ उपसमूहको सेयर मूल्यमा वृद्धि भएको छ भने चार उपसमूहको सेयर मूल्यमा गिरावट आउँदा एउटा उपसमूहको सेयर मूलयमा कुनै परिवर्तन भएको छैन । सोमबार कुल ५६ लाख ४३ हजार ५३ कित्ता सेयर दुई अर्ब ९ करोड ७० लाख ४९ हजार ९४१ मूलयमा खरिद बिक्री भएका छन् । सोमबारको कारोबारपछि बजार पुँजीकरण २७ खर्ब ८२ अर्ब पुगेको छ, आजको कारोबार दैनिकमा खबर छ ।