काठमाडौं । यतिबेला नेपालसहित पूरै विश्व कोरोनाको तेस्रो लहरको चपेटामा छ । दैनिक बढ्दो संक्रमणको ग्राफका कारण मानिसहरू आत्तिएका छन् ।

एकपछि अर्को भेरियन्टमा परिवर्तित हुने कोरोना भाइरसका कारण विश्वभरका मानिसको दैनिक अस्तव्यस्त नै बनेको छ । यसैबीच चीनको वुहानका वैज्ञानिकले एक नयाँ कोरोना भाइरसको भरियन्टलाई लिएर चेतावनी दिएका छन् । जो दक्षिण अफ्रिकामा पाइएको छ ।

वुहानका वैज्ञानिकका अनुसार यो नयाँ भाइरस निकै संक्रामक रहेको छ । यसका साथै यो भाइरस यति घातक हुनसक्छ कि संक्रमित तीन जनामध्ये एक जनाको मृत्यु हुनसक्छ ।

रुसी न्यूज समाचार एजेन्सी स्पुतनिकको रिपोर्ट अनुसार नयाँ कोरोना भाइरस पनि एइआरएस कोभसँग जोडिएको छ । यो भाइरसको प्रकोप सबैभन्दा पहिले २०१२ देखि २०१५ बीचमा पश्चिम एसियाका देशमा भेटिएको थियो ।

यद्यपी यो भाइरसको संक्रमण अहिलेसम्म मानिसमा भने फैलिएको छैन । अफ्रिकामा यो भाइरस चमेरोमा देखिएको थियो । अहिलेसम्म केवल पशुमा मात्रै देखिएको वैज्ञानिकले बताएका छन् ।

बायोरिक्स वेबसाइटमा प्रकाशित अध्ययन अनुसार सार्स–कोभ–२ जस्तै निओकोभ र त्यससँग निकटता भएको पीडीएफ–२१८०–कोभले पनि मानिसलाई संक्रमित गर्नसक्छ ।

वुहान विश्वविद्यालय र चाइनिज एकेडेमी अफ साइन्सेजका सोधकर्ताका अनुसार यो नयाँ कोरोना भाइरसले मानिसको कोशिकामा संक्रमित गर्नका लागि केवल एउटै म्युटेशनको आवश्यकता पर्दछ ।

अध्ययनमा भनिएको छ, ‘नयाँ भाइरस निओकोभमा वर्तमान सार्स–कोभ–२ कोरोना र मिइआरएस–कोभका गुण छन् । जो अध्यधिक संक्रामक बनाउन सक्षम हुन्छन् ।’

यदि यो भाइरस मानिसमा फैलिएको खण्डमा भयानक जोखिम उत्पन्न हुने वैज्ञानिकले चेतावनी दिएका छन् । हरेक तीन संक्रमितमध्ये एक जनाको मृत्यु हुनसक्ने बताइएको छ ।

प्रकाशित मिति: शुक्रबार, माघ १४, २०७८, १३:०४:००