काठमाडौं । चालीसभन्दा धेरै देशका झण्डै ३०० कलाकृति र त्यसलाई निर्माण गर्ने १०० कलाकारसँग काठमाडौंमा साक्षात्कार गर्न पाइने भएको छ ।

यो महत्त्वपूर्ण अवसरको चाँजोपाँजो मिलाउँदै छन्, संस्कृति, पर्यटन तथा नागरिक उड्डयन मन्त्रालय र सिद्धार्थ आर्ट फाउन्डेसन ।

मन्त्रालय र फाउण्डेसनको संयुक्त सहकार्यमा गत वर्ष नै प्रदर्शनी तय थियो । तर कोभिड–१९ महामारीले अन्तिम मितिमा स्थगित हुन पुग्यो ।

नेपालका असंख्य कलात्मक प्रतिभा र कथाहरू प्रस्तुत गर्न र तिनलाई यस क्षेत्रभन्दा बाहिरका परिदृश्यमा पनि संलग्न गर्न प्रदर्शनी आयोजना गरिएको कार्यक्रमकी संस्थापक अध्यक्ष संगीता थापाले जनाएकी छन् ।

अन्तराष्ट्रिय कला महोत्सवको रूपमा परिचित काठमाडौं ट्रियना यही माघ २८ देखि फागुन २७ सम्म हुनेछ ।

ट्रिएनाका लागि रोजिएका प्रत्येक स्थानले सांस्कृतिक तथा ऐतिहासिक महत्त्व बोकेका छन् । जसमा पाटन संग्रहालय, बहादुर शाह बैठक, पाटन, नेपाल आर्ट काउन्सिल, तारागाउँ संग्रहालय र सिद्धार्थ आर्ट ग्यालरी छन् । जहाँ विश्वका कलाकारले आफ्नो कला पस्किने छन् भने कलाका पारखीले धीत मर्नेगरी त्यसको मजा लिन पाउने छन् ।

प्रदर्शनीका निम्ति रोजिएको पाटन संग्रहालय १४ औंदेखि १८ औं शताब्दीसम्म मल्ल वंशका राजाहरूको राजकीय निवास हो । बहादुर शाह बैठक गोरखाका शाहवंशीय शाषकहरूद्वारा सैन्य रणनीति निर्माण गर्न बनाइएको थियो ।

नेपाल आर्ट काउन्सिल सन् १९६२ मा राजा महेन्द्रको संरक्षकत्त्वमा निर्मित नेपालका विशालतम् कला प्रदर्शनी स्थलमध्ये एक हो । छनौटमा परेका अन्य स्थानको पनि आ–आफ्नै ऐतिहासिक महत्ता छन् ।

काठमाडौं ट्रिएना १ वर्षअघि २०७७ को मंसिरमा तय थियो । कोरोना महामारीले स्थगित प्रदर्शनी माघ २८ बाट हुन लागेको हो ।