काठमाडौं । वीर अस्पतालमा गैरकानुनी रूपमा कर्मचारी भर्ना भएको भन्दै अख्तियार दुरुपयोग अनुसन्धान आयोगमा उजुरी परेको छ ।

नेपालवाचलाई प्राप्त भिडियोमा राप्रपाका कार्यकर्ताले अस्पतालमा भएको गैरकानुनी नियुक्तिको भत्सर्ना गरेका छन् ।

वीर अस्पतालले करार सेवामा २०७८/५/२१ गते ५० जना स्टाफ नर्स करारको लागि नियुक्ति गर्ने भनेर सूचना प्रकाशन गरेको थियो ।

तर, त्यसको ठिक १९ दिनपछि अर्थात् २०७८/६/१० गते कोरोनाकालमा न्यून आय भएको कारण देखाइयो ।

ती कार्यकर्ताका अनुसार यही कारणलाई आधार बनाएर स्टाफ नर्स माग गर्दै प्रकाशित गरिएको सूचनालाई रद्द गरियो ।

तत्कालका लागि स्टाफ नर्स नचाहिने भन्दै सूचना रद्द गरे पनि अस्पताललाई नियमविपरित कर्मचारी भर्ना गरेको आरोप लागेको हो ।

सूचना रद्द गरेको तीन महिनापछि भने कुनै लिखित परीक्षा, अन्तर्वार्ता र खुला प्रतिस्पर्धा नै नगराई ५० जना कर्मचारी भर्ना गरेको आरोप छ ।

यसरी मनलाग्दी आफ्ना मान्छे भर्ती गरेको भन्दै राष्ट्रिय प्रजातन्त्र पार्टी(राप्रपा) का केही नेता तथा कार्यकर्ताले आज आयोगमा उजुरी हालेका हुन् ।

अस्पतालले निजामती ऐन २०७५ लाई उल्लंघन गरेर ५० जना आफ्ना मान्छे नियुक्त गरेको उनीहरूको आरोप छ ।