काठमाडौं । कांग्रेस नेता रामचन्द्र पौडेलले सत्ता गठबन्धनको विकल्पमा एमसिसी पास गर्न एमालेको सहयोग लिने बताएका छन् । एमसिसी असफल बनाउँदा पनि सत्ता गठबन्धन भइराख्छ भन्ने नसोच्नसमेत उनले नेताहरूको ध्यानाकर्षण गराएका छन् ।

‘हाम्रो प्रयास सत्ता गठबन्धनकै प्रयासमा एमसिसी पास गर्नुपर्छ भन्ने हो’ तनहुँको दमौलीमा आयोजित पत्रकार सम्मेलनमा पौडेलले भने, ‘एमसिसी फेल बनाएर पनि सत्ता गठबन्धन कायम रहन्छ भन्ने अब नसोच्दा हुन्छ । एमसिसी यस अघि केपी ओली नेतृत्वको सरकारले संसदमा दर्ता गराएको हो । फेरि उसकै समर्थनमा पास गर्नुपर्ने हुन्छ । सत्ता गठबन्धनमा तनावको स्थिति आइरहे कांग्रेस एमालेको माग पूरा गर्नुपर्ने अवस्थामा पनि पुग्नेछ ।’

संसद अवरोध गर्दै आएको एमालेले सभामुखलाई फिर्ता बोलाउनुपर्ने र एमाले विभाजनपछि नेकपा समाजवादीमा लागेका १४ सांसदलाई कारवाही गर्नुपर्ने माग गर्दै आएको छ । सत्ता गठबन्धनमा एमसिसीमा सहमति नजुटे प्रधानमन्त्री देउवाले एमालेको सहयोग लिएर एमसिसी पास गराउने तयारी गरेका छन् ।

यसको लागि देउवाले एमाले अध्यक्ष केपी ओलीसँग पटकपटक वार्ता गरिसकेका छन् । एमालेको सहयोग लिंदा उसले राख्दै आएको माग सम्बोधन गर्नसमेत देउवा तयार रहेको बताइन्छ ।