मरिउपोल । दक्षिणी युक्रेनको दक्षिणपूर्वी सहर मरिउपोलमा रहेको बाल अस्पतालमा बुधबार भएको आक्रमणमा एक बालिकासहित कम्तीमा तीन जनाको मृत्यु भएको स्थानीय अधिकारीहरूले बिहीबार बताएका छन् ।

युक्रेनको घेराबन्दीमा रहेको मरिउपोलमा रहेको बाल तथा प्रसूति अस्पतालमा हिजो भएको आक्रमणमा एक बालिकासहित तीन जनाको मृत्यु भएको नगर परिषद्ले उल्लेख गरेको छ । युक्रेनका राष्ट्रपति भ्लाद्मिर जेलेन्स्कीले अस्पतालमा रुसले गरेको आक्रमण ‘युद्ध अपराध’ भएको बताएका छन् ।

साथै संयुक्त राष्ट्र संघका मानवीय मामिला प्रमुखले युक्रेनी बाल अस्पतालमा भएको आक्रमणलाई अन्तर्राष्ट्रिय मानवीय कानुनको भयानक उल्लंघन भन्दै निन्दा गरेका छन् । रुसी राष्ट्रपतिको कार्यालयले भने अस्पताल आक्रमणबारे सैनिकहरूसँग जानकारी लिने बताएकाे छ ।