काठमाडौं । निर्वाचन आयोगले अबको चुनावदेखि मतपत्र हरियो बनाउनेबारे गरेको निर्णयमा अनेक टिका टिप्पणी भएको छ । मुख्य गरी प्रमुख प्रतिपक्षी दल एमाले अध्यक्ष केपी ओलीले मतपत्रको रङ बदल्ने निर्णयप्रति आपत्ति जनाएका थिए ।

तर निर्वाचन आयोगले मतगणना गर्न सहजताको लागि मतपत्र यसपटकदेखि हरियो हुने निर्णय गरेको जनाएको छ । आयोगका सूचना अधिकारी सूर्यप्रसाद अर्यालले यस अघिको निर्वाचनमा मतपत्र र स्वस्तिक छाप पनि निलो रङको भएकोले यसपटकदेखि अलग अलग गर्न खोजिएको जानकारी दिए ।

मतपत्र र स्वस्तिक छाप दुवै निलो हुँदा मतगणना गर्नसमेत अप्ठ्यारो हुने भएकोले मतपत्र हरियो रङको बनाउन खोजेको उनले बताए । मतगणना गर्दा अलमल नहुने भन्दै कर्मचारीबाट सुझाव आएकोले मतपत्रको रङ बदल्न खोजिएको उनको भनाई छ ।

कुनै दल र नेतालाई द्विविधा भए आयोगले प्रष्ट्याउने उनको भनाई छ ।

कांग्रेसलाई चुनाव जिताउन मतपत्रको रङ हरियो बनाउन खोजेको ओलीको आरोप छ ।