काठमाडौं । क्रिकेटर हरभजन सिंहले पञ्जाब विधानसभा चुनावमा जितपछि आम आदमी पार्टीको तर्फबाट राज्यसभाका लागि उम्मेदवारी दर्ता गरेका छन् । आपले क्रिकेटर हरभजन सिंह र दिल्लीका पार्टी विधायक राघव चड्ढालाई पञ्जाबबाट राज्यसभा चुनावका लागि उम्मेदवार बनाएको छ ।

राज्यसभाका लागि उम्मेदवारी दर्ता गर्ने क्रममा आप नेता राघव चड्डाले भने, ‘यो मेरो लागि ठूलो दिन हो । म मेरी आमासँग उम्मेदवारी दर्ता गर्न आएको हुँ । केजरीवाल जीले ममा विश्वास देखाउनुभएको छ, यति सानो उमेरमा म यहाँ छु ।’

समाचार एजेन्सी एएनआईको रिपोर्टअनुसार  राघव चड्ढा र हरभजन सिंहबाहेक, कृष्ण प्राण ब्रेस्ट क्यान्सर केयर च्यारिटेबल ट्रस्टका संस्थापक सञ्जीव अरोरा, डा. सन्दीप पाठक, लभली प्रोफेशनल युनिभर्सिटीका कुलपति अशोक मित्तललाई आम आदमी पार्टीले राज्यसभा निर्वाचनका लागि पञ्जाबबाट उम्मेदवार बनाइएको छ ।