काठमाडौं । नेकपा (एमाले)का अध्यक्ष केपी शर्मा ओलीले खोटाङमा रहेको प्रसिद्ध धार्मिकस्थल हलेसी मन्दिर र गुम्बालाई ४ लाख रुपैयाँ भेटी चढाएका छन् ।

पूर्वप्रधानमन्त्रीसमेत रहेका ओलीले २ लाख रुपैयाँ हलेसी मन्दिर र अर्को २ लाख हलेसी मारतिका गुम्बालाई चढाएका हुन् ।

ओलीले भेटी आफैँ गएर चढाएका भने होइनन् । उनले एमाले केन्द्रीय सदस्य एवम् खोटाङ सह–इन्चार्ज उषाकला राई, केन्द्रीय सदस्य रमेशकुमार पौडेल र पार्टी जिल्ला अध्यक्ष रामप्रसाद दङ्गालमार्फत राजधानीबाट भेटी पठाएका हुन् ।

गत चैत १९ गते एमालेले दिक्तेलमा आयोजना गरेको जनसभालाई सम्बोधन गर्ने क्रममा ओलीले हलेसी मन्दिर तथा गुम्बा अवलोकन गरेका थिए । त्यसपछि भेटीस्वरुप मन्दिर र गुम्बालाई २–२ लाख दान गर्ने घोषणा गरेका थिए । सोही वाचा अहिले पूरा गरेका हुन् ।