काठमाडौं । अर्थमन्त्री जर्नादन शर्माले देशको अर्थतन्त्र सबल र सक्षम अवस्थामै रहेको दावी गर्दै अर्थतन्त्र कुनै ठूलो संकटमा नआएको बताएका छन् । सोमबार अर्थमन्त्रालयमा आयोजित पत्रकार सम्मेलनमा मन्त्री शर्माले उक्त कुरा बताएका हुन् ।

उनले देश कुनै ठूलो संकटमा नगएको तर विभिन्न निकायहरुबाट गलत हल्ला फैलाएको बताए । उनले भने, ‘अर्थतन्त्रमा कुनै ठुलो संकट आएको छैन । जसरी यहाँ देशमा ठुलो संकट आयो अब देशमा के के न होला भनेर हल्ला फिजाइएको छ । त्यस्तो केही छैन । अर्थतन्त्रलाई नियमित गतीमा चल्नु दिनुपर्छ । यसलाई आलोचना गर्नु हुँदैन,’ मन्त्री शर्माले भने, ‘यसमा राजनीतिकरण गरेर देशलाई फाइदा हुँदैन । व्यवसायीहरुलाई र जनतालाई हत्तोसाहित गर्ने खालको प्रचारबाजी भइरहेको छ ।’

देश संकटमा नगएको भन्दै उनले जनता र व्यवसायीको मनोबल कमाजोर बनाउने अभिव्यक्ति कसैले नदिन उनले आग्रह गरे । त्यस्तै अर्थमन्त्री शर्माले राष्ट्र बैंकका गर्भनर महाप्रसाद अधिकारीमाथि गरिएको कारबाही कानुन सम्मत भएको बताएका छन् । उनले समितिले यस विषयमा काम गरिरहेको अवस्थामा गर्भनरमाथि लगाएको आरोपबारे नबोल्न  आग्रह गरेका छन् ।