काठमाडौं । अन्टार्कटिकामा अब ६ महिनासम्म नउदाउने गरी सूर्य अस्ताएको छ । त्यहाँ अध्ययनका लागि पुगेका वैज्ञानिक तथा आसपास बस्ने मानिसहरुले अब अक्टोबर महिनामा मात्रै अन्टार्कटिकाको आकाशमा सूर्य देख्न पाउनेछन् ।

सन् २०२२ को मे १३ मा अन्टार्कटिकामा यो वर्षको अन्तिम सूर्यास्त भएको हो । अन्टार्कटिकाको रिमोट बेस कन्कोर्डिया फेरि एकपटक युरोपेली अन्तरिक्ष एजेन्सीको १२ सदस्यीय टोली छ महिनासम्म अँध्यारोमा बस्ने भएकाे हाे ।

टोलीको मिशनमा विभिन्न प्रकारका प्रयोगहरू समावेश हुनेछन् । उनीहरुले यस्ता चरम अवस्थाहरूले मानिसहरूलाई कसरी असर गर्छ भनेर बुझ्ने प्रयास गर्नेछन् ।

लामो समय घामको किरण नहुँदा मानिसको निद्रादेखि पेटको स्वास्थ्यसम्म पर्ने असरबारे अध्ययन गर्ने, वर्तमान र भविष्यका अन्वेषकहरूलाई अन्तरिक्षजस्ता वातावरणका चुनौतीहरू बुझ्न र सम्बोधनका लागि सहयोग गर्न सो टोली त्यहीँ बस्ने अन्तरिक्ष एजेन्सीले जनाएको छ ।

बाँकी विश्वमा मानिसहरु चार प्रकारका मौसममा बस्छन् तर अन्टार्कटिकामा जाडो र गर्मी दुईवटा मात्रै छन् । विश्वको सबैभन्दा चिसो महादेशमा ६ महिना दिन र बाँकी ६ महिना अँध्यारो रात हुन्छ ।कन्कार्डिया रिसर्च स्टेसनको तापक्रम केही समयपछि माइनस ८० डिग्री सेल्सियससम्म पुग्नेछ ।