काठमाडौं । नेपाल वायु सेवा निगमका अध्यक्ष युवराज अधिकारी बर्खास्त भएका छन् ।

सोमबार बसेको मन्त्रिपरिषद्को बैठकले उनलाई बर्खास्त गर्ने निर्णय गरेको हो ।

संस्कृति, पर्यटन तथा नागरिक उड्डयन मन्त्रालयको प्रस्तावमा अधिकारीलाई हटाउने निर्णय गरिएको स्रोतले जनाएको छ ।

अधिकारी गत कात्तिकमा संस्कृति, पर्यटन तथा नागरिक उड्डयन मन्त्री प्रेम आलेको सिफारिसमा निगमको अध्यक्षमा नियुक्त भएका थिए ।

आफैंले नियुक्त गरेका भए पनि निर्देशनअनुसार काम नगरेपछि पछिल्लो समय दुईबीचको सम्बन्ध बिग्रिएको थियो । केही दिनअघि मात्रै मन्त्री आलेले अमर्यादित शब्द प्रयोग गर्दै अधिकारीलाई गालीगलौज गरेको भिडियो सार्वजनिक भएको थियो । जुन संवादबाट कर्मचारी नियुक्ति गर्न आलेले पटक पटक निर्देशन दिएको र अधिकारीले पालना नगरेको बुझ्न सकिन्छ ।

मन्त्री आलेले अधिकारीमाथि हातपात गरेका समाचार प्रकाशमा आए पनि यसको स्वतन्त्र पुष्टि भने हुन सकेको छैन ।

यसअघि मन्त्रालयमा हाजिर तानिएका डिमप्रकाश पौडेललाई पनि सरकारले महाप्रबन्धकबाट फिर्ता बोलाएको थियो । योसँगै निगम नेतृत्वविहीन बन्न पुगेको छ ।