काठमाडाैं । गैरकानूनी रुपमा सरकारी कागजात सच्याई भ्रष्टाचार गरेको आरोपमा यातायात व्यवस्था कार्यालय, सवारी चालक अनुमति-पत्र, एकान्तकुना, ललितपुरका तत्कालीन कार्यालय प्रमुखसहित १७ जनाविरूद्ध मुद्दा दायर गरेको छ । अख्तियर दुरूपयोग अनुसन्धान आयोगले आज काठमाडौं विशेष अदालमा उनीहरुविरुद्ध मुद्दा दायर गरेको हो ।

भ्रष्टचारको आरोपमा मुद्दा दायर हुनेहरुमा तत्कालीन कार्यालय प्रमुखहरु सम्बर बहादुर कार्की र राजुभाई कुस्मा, मेकानिकल इन्जिनियर विजय राज गिरीसमेत १२ जना कर्मचारी र ५ जना विचौलियाहरु रहेको अख्तियारले जनाएको छ ।

यातायात व्यवस्था कार्यालय ललितपुरका कर्मचारीहरु तथा सिन्धुली फोटोकपी सेन्टरका सञ्चालक बाबुराम शर्मासमेतले सेटिङमा विचौलियामार्फत सवारी चालक अनुमति पत्र जारी गर्ने गरेको भन्ने समाचार सञ्चार माध्यममा प्रकाशित भएको थियो । सोही समाचारमा आधारित उजुरी निवेदन सम्बन्धमा अनुसन्धान उनीहरुले सवारी चालक अनुमति-पत्रको नवीकरण गर्ने सम्बन्धमा गलत नियतले मातहतका कर्मचारीहरुलाई अख्तियारी प्रदान गरेको खुलेको अख्तियारले विज्ञप्तिमार्फत जनाएको छ ।

आरोपीहरूले भ्रष्टाचार निवारण ऐन, २०५९ को दफा ११ बमोजिमको कसुर गरेकोले सोही ऐनअनुसार उनीहरूविरूद्ध सजायका लागि मागदाबीसहित आरोपपत्र दायर गरेको अख्तियारका प्रवक्ता श्यामप्रसाद भण्डारीले बताए ।