काठमाडौं । नेकपा (एमाले)का अध्यक्ष केपी शर्मा ओलीले नेपालका ६० प्रतिशत मानिस कृषि पेशामा भएर पनि आयातको ठूलो हिस्सा कृषिजन्य सामग्री नै हुनु दुःखद भएको बताएका छन् । १९औं धान दिवसको अवसरमा भक्तपुरको सिरुटारमा आयोजित रोपाइँ महोत्सवमा उनले यस्तो बताएका हुन् ।

‘अहिले हामी आफैंले गर्दै आएको लापरबाही, असावधानी, प्रयासको कमी यस्तो भएको हो । अब यसको अन्त्य गर्नुपर्नेछ,’ उनले भने, ‘यो अवस्थाको सुधार गरेसँगै हामी कृषिको व्यवसायीकरणतर्फ लम्कनेछौं । आफैंलाई सुधार गरे उन्नत बीउ र आफ्नै जीवनस्तरसमेत सुधार गर्न सकिनेछ ।’

ओलीले नेपालको भूबनोटअनुसार उपयुक्त हुने भएकाले धानबालीमा जोड दिनुपर्नेसमेत बताए ।

धानको व्यवसायीकरण गर्दै उत्पादन र उत्पादकत्व बढाउनुपर्नेमा उनको जोड थियो ।