काठमाडौं । नेपाली कांग्रेसका उपसभापति धनराज गुरुङ सवार स्कार्पियो गाडी रामेछापमा ठूलो दुर्घटनाबाट जोगिएको छ ।

गुरुङ सवार बा १९ च १८३९ नम्बरको गाडी सडक किनाराबाट भीरतर्फ तल खस्न लागेको अवस्थामा ढुंगाको ओड लागेर जोगिएको हो ।

नेता गुरुङले सामाजिक सञ्जालमा आफू सवार गाडीको तस्बिर पोस्ट् गर्दै ठूलो दुर्घटनाबाट बचेको लेखेका छन् ।

गुरुङले पोस्ट् गरेको तस्बिरमा उनको गाडी सडकको लिग छाडेर तल पुगिसकेको अवस्थामा ओड लागेर रोकिएजस्तो देखिन्छ ।

रामेछापको गोगनेमा बिहीबार बिहान गुरुङ सवार गाडी दुर्घटना नजिक पुगेको हो ।

‘रामेछाप गोगनेमा हामी चढेको गाडी अचानक सडक किनारबाट तल गयो तर अगाडि ढुंगाको ओट लाग्न पुगेकोले ठुलो घट्ना हुनबाट जोगियो,’ उनले सामाजिक सञ्जालमा लेखेका छन् ।

गुरुङका अनुसार गाडीमा सवार उनीसहित सबैजना सकुशल छन् ।

गाडीमा उपाध्यक्ष गुरुङसहित रामेछापका महाधिवेशन प्रतिनिधि रत्न कार्की, ललितपुर जिल्ला सदस्य सानुबाबु महर्जनलगायत पाँच जना सवार थिए । उनीहरु ओखलढुंगाका कांग्रेस नेता प्रदीप सुनुवारको निवास पुगेर फर्कंदै थिए । नेता सुनारको श्रीमतीको निधन भएपछि उनको परिवार शोकमा छ ।