वाशिंटन । अमेरिकामा सोमबार सिकागोनजिकैको हाइल्याण्ड पार्कमा अमेरिकी स्वतन्त्रता दिवसको अवसरमा निकालिएको परेडमा एक बन्दुकधारीले अन्धाधुन्ध गोली चलाउँदा ६ जनाको मृत्यु भएको छ । यस आक्रमणमा कम्तीमा २४ जना घाइते भएको बताइएको छ ।

हाइल्याण्ड पार्कका प्रहरी प्रमुखले आक्रमणमा संलग्न २२ वर्षीय संदिग्धलाई पक्राउ गरिएको दाबी गरेका छन् । प्रहरीले एक राइफलसमेत बरामद गरेको छ ।

राष्ट्रपति जो बाइडेनले विज्ञप्ति जारी गर्दै शोक व्यक्त गरेका छन् । उनले आक्रमणपछि हाइल्याण्ड पार्कका जनताको सहयोगका लागि स्थानीय प्रशासनलाई पूर्ण सहयोग गर्न आफू तयार रहेको बताए ।

राष्ट्रपति बाइडेनले परेड शुटिङको घटनाबारे थाहा पाएर आफू स्तब्ध भएको बताए । उनले अमेरिकामा बन्दुक हिंसाविरुद्धको लडाई जारी राख्ने पनि बताएकाछन् ।

प्रहरीले अग्लो भवनको छतबाट परेडमा निस्किएका मानिसहरूमाथि गोली प्रहार गरेपछि बालबालिका लिएर आएका सयौं मानिस डराएर यताउता दौडिन थालेको प्रहरीले जनाएको छ । आक्रमणपछि संदिग्ध केही घण्टासम्म फरार भएका थिए ।

Jill and I are shocked by the senseless gun violence that has yet again brought grief to an American community this Independence Day. As always, we are grateful for the first responders and law enforcement on the scene.

I will not give up fighting the epidemic of gun violence.

— President Biden (@POTUS) July 4, 2022

हाइल्यान्ड पार्कका प्रहरी प्रमुख लु जोगम्यानले पक्राउ परेका २२ वर्षीय रोबर्ट इक्रिमोको रूपमा पहिचान भएको बताए । समाचार एजेन्सी पिटिआईका अनुसार प्रहरीले आक्रमणकारीको पहिचान कसरी भयो भन्ने कुरा बताउन अस्वीकार गरेको छ ।

इलिनोइस राज्यका गभर्नर जे रोबर्ट प्रिट्जकरले गोलीबारी अमेरिकामा साप्ताहिक परम्परा भएको चेतावनी दिए । परेड सुरु भएको १० मिनेटमै फायरिङ सुरु भएको थियो । अमेरिकामा गत महिना टेक्सास, बफेलो सुपरमार्केटलगायत धेरै ठाउँमा गोली चलेको घटना भएको थियो ।