काठमाडाैं । सरकारले लक्ष्यअनुरूप विकास खर्च गर्न नसकेको अवस्थामा आर्थिक वर्षको अन्त्यतिर भने असारे विकासका लागि दाैडथुप गर्छन् । असारमा आएर ठूलो बजेट खर्च गर्ने प्रवृत्ति हरेक आर्थिक वर्षममा दोहोरिने गर्छ ।

महालेखा नियन्त्रक कार्यालयको तथ्यांक अनुसार पछिल्लो २५ दिन (असारयता) मा विकास खर्च मात्र ५२ अर्ब रुपैयाँ भएको छ । ३१ जेठ २०७९ मा विकास खर्च १३७ अर्ब रुपैयाँ मात्र भएको थियो । तथ्यांक अनुसार शनिबारसम्ममा विकास खर्च १८९ अर्ब पुगेको छ । यो पछिल्लो २५ दिनमा भएको पूँजीगत खर्च हो ।

कार्यालयका अनुसार शनिबार मात्र १५ अर्ब रुपैयाँ बराबर पूँजीगत खर्च भएको छ । शनिबारसम्म विकास खर्च ५०.११ प्रतिशत गरेको छ । विकास खर्चसँगै चालु र वित्तीय व्यवस्थातर्फको भुक्तानी समेत असार लागेसँगै उल्लेख्य बढेको छ । ३१ जेठमा १० खर्ब ३५ अर्ब रुपैयाँ रहेको कुल बजेट खर्च २५ दिनमा २ सय २ अर्बले बढेर १२ खर्ब ३७ अर्ब रुपैयाँ पुगेको छ । यो कुल विनियोजित बजेटको ८९.०५ प्रतिशत हो ।

यस आवमा सरकारले ३ खर्ब ७८ अर्ब रुपैयाँ विकास खर्च गर्ने लक्ष्य राखेको छ ।