हिन्दी सिनेमामा विविध भूमिका निर्वाह गर्ने अभिनेत्रीको चर्चा हुँदा कृति सेननको नाम शीर्ष स्थानमा आउँछ। उनका फ्यानहरूले पनि उनका आगामी फिल्म ‘आदिपुरुष’, ‘भेडिया’, ‘गणपत’ र ‘शहजादा’बाट धेरै अपेक्षा गरेका छन् ।

पराक्रमी राममाथि बन्न लागेको उनको फिल्म ‘आदिपुरुष’ उनको बहुप्रतिक्षित चलचित्र हो । यसलाई भारतीय दर्शक मात्र होइन, विश्वका अन्य देशमा बसोबास गर्ने करोडौं भारतीय मूलका दर्शकले पनि प्रतीक्षा गरिरहेका छन् । यो करिब २० हजार स्क्रिनमा रिलिज गर्ने तयारी छ ।

कृतिलाई थाहा छ यो फिल्म उनको लागि कति महत्त्वपूर्ण छ। उनी भन्छिन्, ‘फिल्म ‘आदिपुरुष’ हामी सबैका लागि विशेष फिल्म हो र यसमा सीताको भूमिका पनि ठूलो जिम्मेवारी हो । म भाग्यमानी छु कि मैले यस्तो पात्रको भूमिका निर्वाह गर्ने मौका पाएको छु ।’

उनले यस चलचित्रमा बनाएको सीताको छवि सानो वा ठूलो पर्दामा देखिएका सीताभन्दा पृथक छ । त्यसैले यो फिल्म भारतीय सिनेमाकै लागि नयाँ पहिचान बनेर आउने उनको विश्वास छ ।

कृतिका पछिल्ला दुई फिल्म ‘बच्चन पाण्डे’ र ‘हम दो हमारे दो’ ले खासै कमाल गर्न सकेनन् । तर, यी दुवै फिल्ममा कृतिले आफ्नो क्यारेक्टरका लागि निकै मिहिनेत गरिन् । उनी भन्छिन्, ‘फिल्मले बक्स अफिसमा कस्तो नतिजा ल्याउने हो, यो फिल्म बनाउँदा कसैलाई थाहा थिएन । हरेक फिल्मको लागि हाम्रो शत प्रतिशत समर्पण देखाउनु हाम्रो बसमा छ। कुनै पनि क्यारेक्टरलाई जीवन्त पार्न जे गर्नुपर्छ, त्यो म गर्छु ।’

बाल्यकालदेखि नै माधुरी दीक्षितलाई मन पराउने कृति सेनन पेशाले इन्जिनियर हुन् । बुबा राहुल सेनन सिए र आमा फिजिक्सका प्रोफेसर छन् । बहिनी नुपुरको मोडलिङ र अभिनयमा पनि निकै नाम छ । कृति निर्देशक आशुतोष गोवारीकरको फिल्म ‘पानीपत’ लाई आफ्नो करियरको टर्निङ प्वाइन्ट मान्छिन् ।

उनी भन्छिन्, ‘पानीपतको युद्धमा आधारित फिल्ममा युवतीको चरित्र देखापर्छ भने त्यो आफैंमा ठूलो कुरा हो । युद्धमा आधारित फिल्ममा यस्तो हुँदैन तर फिल्म ‘पानीपत’मा यस्तो भएको थियो । एक अभिनेत्रीको हैसियतमा, मलाई लाग्छ कि त्यहाँ मेरो धेरै प्रशंसा भएको थियो र त्यसपछि मात्र मैले महसुस गरेँ कि मैले अझै चुनौतीपूर्ण काम गर्न सक्छु ।

फिल्म ‘मिमी’ बाट दर्जनौं अवार्ड जितिसकेकी कृति यस फिल्मको चर्चा चलिरहँदा उत्साहित छिन् । भन्छिन्, ‘कतै यस्तो पात्रको खोजीमा थिएँ । कहिलेकाहीँ हामीभित्रबाट केही काम गर्न तयार हुन्छौं र तपाईंले पनि त्यसै गर्ने मौका पाउनुहुन्छ। ‘लुका छुपी’ मा काम गरेपछि मात्रै यो फिल्म पाएको हो । ‘लुका छुपी’ निकै हलुका फिल्म भए पनि ‘मिमी’ निकै भावुक फिल्म हो । ‘लुका छुपी’ मा निकै भावुक दृश्य थियो, त्यसपछि मलाई ‘मिमी’को चुनौतीपूर्ण भूमिका दिइयो ।’

(अमर उजालाबाट अनुदित)