काठमाडौं । आगामी मंसिर ४ हुन गइरहेको प्रतिनिधिसभा र प्रदेशसभा निर्वाचनमा सिट बाँडफाँटका विषयमा छलफल गर्न गठबन्धन कार्यदलको बैठक अहिले बालुवाटारमा जारी छ ।

कार्यदल गठनपछि बसेको पहिलो बैठकमा सिट बाँडफाँटको मापदण्डका विषयमा छलफल हुने बालुवाटारनिकट स्रोतले जानकारी दियो ।

गठबन्धनका शीर्ष नेताहरूले सिट बाँडफाँटका लागि तीन दिनअघि मात्र ११ सदस्यीय कार्यदल गठन गरेकका थिए ।

कार्यदलमा नेपाली कांग्रेसबाट तीन तथा अन्य दलबाट दुई-दुई जना सदस्य रहेका छन् ।

कार्यदलमा कांग्रेसबाट पूर्वमहामन्त्री कृष्णप्रसाद सिटौला, सूचना तथा सञ्चार प्रविधिमन्त्री ज्ञानेन्द्रबहादुर कार्की र महामन्त्री गगन थापा रहेका छन् ।

यस्तै, नेकपा (माओवादी केन्द्र)बाट वर्षमान पुन र अर्थमन्त्री जनार्दन शर्मा रहेका छन् ।

नेकपा (एकीकृत समाजवादी)बाट बेदुराम भुसाल र प्रमेश हमाल कार्यदलका सदस्य रहेका छन् ।

यसैगरी, जसपाबाट रामसहायप्रसाद राय र रकम चेम्जोङ तथा राष्ट्रिय जनमोर्चाबाट हिमलाल पुरी र आनन्द शर्मा सदस्य रहेका छन् ।