काठमाडौं । अमेरिकी संसदको तल्लो सदन हाउस अफ रिप्रिजेन्टेटिभकी सभामुख न्यान्सी पेलोसीले ताइवानमाथि थप दबाब बढाउन चीनलाई अमेरिकाले नदिने बताएकी छन् । साथै उनले ताइवान भ्रमणप्रति कुनै पश्चाताप नरहेको पनि प्रष्ट पारेकी छन् ।

पेलोसीले भर्खरै ताइवानको भ्रमण गरेकी थिइन् जसको विरोधमा चीनले ताइवाननजिकै सैन्य अभ्यास गरेको थियो।

पेलोसीको यो अभिव्यक्ति त्यतिबेला आएको छ, जतिबेला चीनले आफ्नो सैन्य अभ्यास स्थगत गरेको छ ।

पेलोसीले आफूलाई ताइवान भ्रमणप्रति कुनै पश्चाताप नरहेको पनि बताइन् । ताइवानको प्रजातन्त्रलाई समर्थन गर्न तथा ऊ एक्लो छैन भन्ने देखाउन त्यहाँको भ्रमण गरेको उनको भनाइ छ ।

चीनले स्वशासित ताइवानलाई छुट्टै प्रान्तको रूपमा हेर्छ। चीनले आवश्यक परेमा ताइवानलाई गाभेर बल प्रयोग गर्ने पनि बताएको छ ।

न्यान्सी अमेरिकी उपराष्ट्रपति कमला ह्यारिसपछि अमेरिकी राष्ट्रपतिको दौडमा दोस्रो मानिन्छिन् ।

सन् १९९७ मा न्युट गिङरिचले ताइवान भ्रमण गरेका थिए । त्यसपछि यस द्वीपको भ्रमण गर्ने पेलोसी सबैभन्दा वरिष्ठ अमेरिकी नेता हुन्।