काठमाडौंं । काठमाडौं उपत्यकाको फोहर उठाउनमा ठूला राजनीतिक दलका नेता–कार्यकर्ताले नै अवरोध गरेपछि काठमाडौं महानगरपालिकाका मेयर बालेन शाह आक्रामक बन्दै गएका छन् ।

सोमबार राजनीतिक दलका स्थानीय नेता–कार्याकर्ताका गलत मागको खण्डन गरेका उनले मंगलबार माओवादी केन्द्रका अध्यक्ष पुष्पकमल दाहाल प्रचण्डप्रति टिप्पणी गरेका छन् ।

ककनीको बाटो बिजोक बनाउने ठेकेदारको घरमा प्रचण्ड अंगरक्षक जसरी बसिरहेको उनको आरोप छ ।

सामाजिक सञ्जालमा स्टाटस लेख्दै मेयर शाहले यस्तो आरोप लगाएका हुन् ।

‘श्रीमान् प्रचण्डज्यू, उपत्यकाको फोहर लैजान प्रयोग गरिने ककनीको बाटो विगत आठ वर्षदेखि यस्तो हालतमा बनाउने मान्छेको घरमै अङ्गरक्षक जस्तो बसेर कुन नैतिकताले भन्नु म देश बनाउँदै छु भनेर,’ उनले सडकको हालतको भिडियो फेसबुकमा राख्दै भनेका छन् ।

प्रचण्ड चर्चित ठेकेदार शारदाप्रसाद अधिकारीको खुमलटारस्थित घरमा बस्दै आएका छन् । अधिकारीलाई थुप्रै विकास आयोजना अलपत्र पारेको आरोप लागेको छ ।

काठमाडौंको फोहर व्ववस्थापनमा सघाउन आग्रह गर्दै मेयर शाहले केही समयअघि प्रचण्डलाई भेटेका थिए । तर, उनका कार्यकर्ताले फोहर व्यवस्थापनमा अवरोध गर्दै आएका छन् ।

फोहर अवरोधमा प्रतिपक्षी एमाले र राप्रपा पनि मिलेकोमा भावुक हुँदै बालेनले भने : सीमित व्यक्तिका स्वार्थ पूरा गर्न सक्तिन