काठमाडौं । अर्थमन्त्री जनार्दन शर्माले संसदीय छानबिन समितिबाट ‘क्लिन चिट’ पाएर पुनर्वहाली गरेपछि पहिलोपटक मन्त्रालयका सहसचिवहरूको जिम्मेवारी हेरफेर गरेका छन् ।

मन्त्रालयको सोमबार बसेको बैठकले सहसचिवहरू शिवप्रसाद तिवारी, राजेश्वर ज्ञवाली, शम्भुप्रसाद मरासिनी र ढुण्डीराज निरौलाको जिम्मेवारी हेरफेर गरेको हो ।

मन्त्रालय स्रोतका अनुसार आन्तरिक राजश्व विभाग अन्तर्गतको ठूला करदाता कार्यालयका प्रमुख कर प्रशासक शिवप्रसाद तिवारीलाई उक्त जिम्मेवारीबाट हटाइएको छ ।

उक्त जिम्मेवारी अब राजेश्वर ज्ञवालीले पाएका छन् । ज्ञवाली मन्त्रालयको आर्थिक नीति विश्लेषण महाशाखा प्रमुख थिए । तिवारीलाई भने राजस्व तालिम केन्द्रको जिम्मेवारी दिइएको छ ।

त्यस्तै, साना तथा मझौला करदाता कार्यालयमा कार्यरत शम्भुप्रसाद मरासिनीको ठाउँमा ढुण्डीराज निरौलालाई पठाइएको छ । निरौला मन्त्रालयका प्रवक्ता हुन् । मरासिनीलाई महालेखा नियन्त्रकको कार्यालयमा सरुवा गरिएको छ ।