उज्जैनको महाकाल मन्दिर दर्शन गर्नबाट बलिउडका चर्चित जोडी रणवीर कपुर र आलिया भट्टलाई अवरोध गरिएको छ । मंगलबार साँझ मन्दिर दर्शनका लागि पुगेका उनीहरूलाई हिन्दुवादी संगठनले अवरोध खडा गरेका हुन् ।

रणवीर र आलियाको फिल्म ब्रह्मास्त्र यही शुक्रबार रिलिज हुँदैछ । फिल्म रिलिजअघि दुवै जना आशीर्वाद लिन महाकाल मन्दिर पुगेका थिए । तर बजरंग दलका कार्यकर्ताले उनीहरूविरुद्ध नाराबाजी गर्दै रोके ।

समाचार एजेन्सी पिटिआइका अनुसार, स्थिति तनावग्रस्त बनेपछि प्रहरी नै परिचालन गरिएको थियो र प्रदर्शनकारी तितरबितर पार्न लाठी प्रहार गरिएको थियो । तैपनि, मन्दिर दर्शन गर्ने रणवीर र आलियाको चाहना पूरा हुन सकेन ।

रणवीर कपुर र आलिया भट्ट दर्शनका लागि पुगेपछि बजरंग दलका कार्यकर्ताले ‘जय श्री राम’ नारा लगाएका थिए । बजरंग दलका नेता अंकित चौबेले सञ्चारमाध्यमसँगको कुराकानीमा रणवीरले केही दिनअघि गाईको मासु मनपर्ने बताएकाले दर्शनका लागि पुगेका उनको अवरोध गरिएको बताए । केही दिनअघि मासुबारे सोधिएको जवाफमा मांसाहर कपूरले आफूलाई खसी, कुखुरा र गाईको मासु खान मनपर्ने बताएका थिए ।