एजेन्सी । भारतको गुजरातस्थित मोरबीमा झोलुङ्गे पुल भत्किदाँ कमसेकम एक सय ३७ जनाको मृत्यु भएको छ ।

मृत्युको संख्या अझै बढ्न सक्ने भारतीय सञ्चारमाध्यमहरूले जनाएका छन् ।

लामो समयसम्म पुर्ननिर्माण तथा मर्मत भएपछि अघिल्लो हप्तामात्रै उक्त पुल सञ्चालनमा आएको थियो । सञ्चालनमा ल्याइएको केही दिनमै आइतबार साझ ६ बजे पुल भत्कियो । दिपावलीको छेको पारेर खोलिएको उक्त पुलमा पाँच सय भन्दा मानिस त्यस दिन जम्मा भएका थिए ।

भारतीय सञ्चारमाध्यमले जनाएअनुसार उक्त पुल खोलिनुअघि लिनुपर्ने फिटनेस सर्टिफिकेट नै नलिइ खोलिएको थियो ।

गुजरात पर्यटन विभाग र मोरबी शहरको आधिकारिक वेबसाइटअनुसार यो पुल आजभन्दा सय वर्ष पहिला बनेको हो । यसलाई भारतमा इन्जिनियरिङ चमत्कार मानिन्छ जसले मोरबीका शासकहरूको प्रगतिशील र वैत्रानिक प्रकृतिलाई झल्काउँछ ।

माच्छु खोलामाथि रहेको यो पुल १.२५ मिटर चौडा र दुई सय ३३ मिटर लामो थियो । घटनाबारे पूर्ण विवरण अझै आउन बाँकी छ ।