काठमाडौं । आगामी मंसिर ४ मा हुन गइरहेको प्रदेश तथा प्रतिनिधिसभा निर्वाचनको प्रचारप्रसार गर्न आजदेखि खुला गरिएको छ ।

निर्वाचन आयोगले बिहीबारदेखि १७ दिन दलहरूले चुनावी प्रचार गर्न पाउने जनाएको छ ।

बुधबारसम्म घरदैलो अभियान गरेका दलले बिहीबारदेखि आगामी मंसिर १ गतेसम्म आमसभा, जुलुस, कोणसभा र सञ्चारमाध्यममा प्रचारप्रसार गर्न पाउनेछन् ।

आमसभासहितको चुनाव प्रचार गर्ने समय पनि आयोगले तोकेको छ । आयोगका अनुसार, बिहान ८ बजेदेखि साँझ ५ बजेसम्म मात्र दल र तिनका उम्मेदवारले चुनाव प्रचारप्रसार गर्न पाउँछन् ।

उम्मेदवारहरूले आफ्नो चुनावी घोषणापत्रमा उल्लेख भएकाबाहेक अन्य आश्वासन, प्रलोभनसमेत यो अवधिमा दिन पाउँदैनन् ।

आयोगले आचारसंहिताको परिधिमा रहेर प्रचार गर्न सबैमा अनुरोध गरेको छ । आचारसंहिता उल्लंघन गर्ने ७१ उम्मेदवारलाई आयोगले यसअघि नै स्पष्टीकरण सोधिसकेको छ ।