काठमाडौं । विद्यालयका प्रधानाध्यापकले नै नक्कली शैक्षिक प्रमाणपत्र देखाएर शिक्षक पदमा नियुक्ति लिएको पाइएको छ । झुटा शैक्षिक प्रमाणपत्र पेस गरेर नियुक्ति लिएको खुलेपछि अख्तियार दुरूपयोग अनुसन्धान आयोगले ती शिक्षकका नाममा १५ दिने सूचना जारी गरेको छ ।

चितवनको कालिका नगरपालिका–५ स्थित भिमोदय नमुना माध्यमिक विद्यालयका प्रधानाध्यापक हरिप्रसाद कँडेलले झुटा शैक्षिक प्रमाणपत्र लिएर शिक्षक पदमा नियुक्ति लिएको खुलेको हो ।

यसबारे उजुरी परेपछि अख्तियार दुरूपयोग अनुसन्धान आयोगले छानबिन अघि बढाएको छ ।

भ्रष्टाचार निवारण ऐन, २०५९ को दफा ४३ बमोजिम कँडेललाई १५ दिनभित्र सम्पर्क गर्न सूचना जारी गरिएको अख्तियारले जनाएको छ । सूचनामा उनलाई कोठा नं. ४०२ मा सम्पर्क गर्न भनिएको छ ।