काठमाडौं । इजरायलको नयाँ अति दक्षिणपन्थी सरकारका राष्ट्रिय सुरक्षा मन्त्रीले सबै सार्वजनिक स्थानहरूबाट प्यालेस्टिनी झण्डा हटाउन आदेश दिएका छन्।

इजरायली मन्त्री इटामार बेन–गिभिरको तर्क छ, प्यालेस्टिनी झण्डा देखाउनु भनेको ‘आतंकवाद’ लाई समर्थन गर्नु बराबर हो ।

गत हप्ता लामो समयदेखि जेलमा रहेका प्यालेस्टिनी कैदीलाई रिहा गरेपछि यसैको जवाफमा इजरायली मन्त्रीले यस्तो आदेश दिएको विश्वास गरिएको छ ।

हालको इजरायली कानूनले सुरक्षा अधिकारीहरूलाई झण्डा हटाउन अनुमति दिन्छ ।

बेन गिभिरको आदेशलाई प्यालेस्टाइनसँग बढ्दो विवादको अर्को कारणको रूपमा हेरिएको छ। बेन्जामिन नेतन्याहु सरकारलाई इजरायलको इतिहासमा सबैभन्दा कट्टरपन्थी सरकारहरूमध्ये गनिन्छ।

बेन गिभिरले हालै जेरुसेलमको अल–अक्सा मस्जिदको पनि भ्रमण गरेका थिए, जसबारे साउदी अरेबिया, युएईलगायत धेरै मुस्लिम देशहरूले आपत्ति जनाएका थिए।