काठमाडौं । नेपालवाच डटकमले भोलिबाट साप्ताहिक कार्यक्रम एजुकेसन डायलग प्रशारण गर्ने भएको छ ।

यसअघि नेपालवाचले हरेक आइतबार पोलिसी डायलग र हरेक मंगलबार प्रशासनका कुरा सञ्चालन गर्दै आएको छ । नेपालवाच डट कमले शिक्षा क्षेत्रको सुधारका लागि बहस थालनी गर्न एजुकेसन डायलग सुरू गर्नेे भएको हो ।

किङ्स कलेजको सहकार्यमा सञ्चालन हुने यो कार्यक्रम हरेक बिहीबार विहान ७ बजे नेपालवाच डट कम र यसको युट्युब च्यानलमा प्रशारण हुनेछ ।

यो कार्यक्रमलाई किङ्स कलेजका प्रधानाध्यापक नरोत्तम अयार्लले सञ्चालन गर्नेछन् । नागरिक तहबाट राज्यसँग जनाइने हरेक असन्तुष्टि हल गर्न अन्य विषयसँगै शिक्षा नीति र सिकाई प्रणालीमा रहेको त्रृटी नसच्याई सम्भव छैन भन्ने निष्कर्ष सहित यो बहसको थालनी गर्न लागिएको हो ।

कार्यक्रममा विषय विज्ञले विद्यार्थी, अभिभावक, शिक्षक लगायत शिक्षासँग प्रत्यक्ष सरोकार राख्ने पक्षहरुसँग संवाद गरिनेछ ।

‘पत्रकारिताले समस्या खोज्नेमात्रै होइन, त्यसको समाधानलाई पनि जोडसँग उठाउनसक्नुपर्छ । हामी समस्यामात्रै बढी केन्द्रीत भयौं । यसअघि हाम्रा नीतिमा समस्या छन् र त्यसको हल खोज्नुपर्छ भनेर हामीले पोलिसी डायलग सुरू गरेका थियौं,’ नेपालवाच मल्टिमिडियाका अध्यक्ष र नेपालवाच डट कमका सम्पादक पुष्प ढुंगानाले भने, ‘काम गर्दै जाँदा समस्याको मूल समाधान त शिक्षाबाट खोज्नुपर्छ जस्तो लाग्यो । यहाँ भएका समस्या र सुधारका लागि बहसको खाँचो देखेर यो कार्यक्रम सुरु गर्ने जमर्को गरेका हौं ।’

कार्यक्रमले अभिभावक, विद्यार्थी र शिक्षामा सरोकार राख्ने सबैको भविष्यलाई ऐना जस्तै देखाउने विश्वास लिइएको छ ।