काठमाडौं (एजेन्सी) । ‘बस’ भन्ने बित्तिकै हामी आममानिसको आवतजावतमा प्रयोग हुने सवारीसाधन भन्ने सम्झन्छौं ।

बसबारे यस्तो धारणा बनायौं भने अबचाहिँ गल्ती हुनेछ । किनभने, मानिस नभएर कुकुर मात्र चढ्ने बस पनि सञ्चालनमा छन् ।

अलास्कामा कुकुरका लागि मात्र चल्ने बस अहिले संसारभर चर्चाको विषय बनेको छ ।

यो बस मो माउन्टेन म्याट्स नामक कुकुर सेवा कम्पनीले सञ्चालनमा ल्याएको हो । यो बसमा मानिस चढ्न पाउँदैनन् । कम्पनीका दम्पतीले कुकुरहरूलाई बसमा चढाएर विशेष ठाउँमा घुम्न लैजान्छन्। यस्ता कुकुर तालिम प्राप्त छन् । बिबिसीका अनुसार, ती कुकुरहरू यात्राका क्रममा आफ्नो सिटमा मात्रै बस्ने गरेका छन् ।

बसमा कुकुर चढेको भिडियो सामाजिक सञ्जालमा निकै भाइरल भइरहेको छ ।