काठमाडौं । प्रधानमन्त्री पुष्पकमल दाहाल प्रचण्ड र एमालेका अध्यक्ष केपी ओलीबीच पछिल्लो समय दैनिक भेटवार्ता हुन थालेको छ ।

मंगलबार प्रधानन्त्रीलाई भेट्न ओली बालुवाटार गएका थिए तर चौबिस घण्टा नबित्दै ओलीलाई भेट्न प्रधानमन्त्री प्रचण्ड ओली निवास बालकोट गएका छन् ।

राष्ट्रपति निर्वाचनको विषयमा प्रधानमन्त्री र ओलीबीच संशय पैदा भइरहेको, रास्वपा सरकारबाट बाहिरिएको, जसपा र नाउपा सरकारमा सहभागी नभएको अवस्थामा दुई शीर्ष नेताबीचको बालुवाटार र बालकोट ओहोर–दोहोरलाई राजनीतिमा निकै अर्थपूर्ण रूपमा हेरिएको छ ।

हिजो भएको भेटवार्तामा पछिल्लो राजनीतिक घटनाक्रम, राष्ट्रपति निर्वाचनलगायत विषयमा छलफल भएको थियो । आजपनि सोही विषयमा छलफल भएको प्रधानमन्त्रीको सचिवालयले जनाएको छ ।

भेटवार्तामा ओलीले राष्ट्रपति निर्वाचनमा प्रधानमन्त्रीको धारणाबारे ओलीले चासो व्यक्त गरेका छन् । सरकार गठनअघि राष्ट्रपति एमालेलाई दिने सहमति भएपनि प्रचण्डले विश्वासको मत लिएपछि राष्ट्रपतिमा राष्ट्रिय सहमतिको आवश्यक रहेको सार्वजनिक अभिव्यक्ति दिँदै आएका छन् । निर्वाचन आयोगले फागुन २५ गने राष्ट्रपतिको निर्वाचन गर्ने तयारी गरेको छ ।