काठमाडौं । राष्ट्रपतिको विषयमा सत्ता साझेदार दल एमाले र माओवादी केन्द्रबीच अविश्वास बढिरहेको समयमा प्रधानमन्त्री पुष्पकमल दाहाल ‘प्रचण्ड’ र एमालेका अध्यक्ष केपी ओलीबीच दुई घण्टा लामो भेटवार्ता भएको छ ।

बिहीबार प्रधानमन्त्री निवास बालुवाटारमा दुई शीर्ष नेताबीच ‘वान टु वान’ भेटवार्ता भएको प्रधानमन्त्रीको सचिवालयले बताएको छ । पूर्वसहमति बमोजिम राष्ट्रपति एमालेले पाउनुपर्ने भन्दै ओलीले प्रधानमन्त्रीलाई निरन्तर दबाब दिइरहेका छन् । तर प्रधानमन्त्री प्रचण्डले राष्ट्रपतिमा राष्ट्रिय सहमति हुनुपर्ने अडान कायमै राखेका छन् ।

पूर्वअडानबाट पछि हटेर प्रधानमन्त्री पछिल्लो समय कांग्रेससँग नजिकिएको आशंका ओलीले गर्दै आएका छन् । सोही आशंकाबीच ओलीले लामो भेटवार्ता गर्नुलाई अर्थपूर्ण रूपमा हेरिएको छ ।

सरकार गठन भएयता प्रधानमन्त्री र ओलीको यो छैटौं पटक भेटवार्ता हो । राष्ट्रपतिको निर्वाचन २५ फागुनमा गर्ने निर्वाचन आयोगले तयारी गरेको छ । १३ फागुनमा उम्मेदवार मनोनयन दर्ता गर्ने कार्यतालिका छ ।