काठमाडौं (एजेन्सी) । अमेरिकाको दक्षिणी क्यालिफोर्नियामा भारी हिमपात गराएको चिसो आँधी पूर्वतिर सरेको छ । जसको प्रभावले त्यो क्षेत्रको जनजीवन प्रभावित बनेको छ ।

बिबिसीका अनुसार, ओक्लाहोमा, कान्सास, मिसौरी र टेक्सासमा आँधीले घर भत्काउनुका साथै विद्युत् सेवा अवरुद्ध पारेको छ । हजारौं मानिस विद्युत सेवाबाट वञ्चित बनेका छन् ।

आँधीमा परी हालसम्म कम्तीमा १२ जना घाइते भएका छन् ।

अमेरिकाको माथिल्लो मध्यपश्चिम क्षेत्रको मौसम यस हप्ताको अन्त्यसम्म खराब रहने पूर्वानुमान छ।

अहिलेसम्म सबैभन्दा बढी विनाश क्यालिफोर्नियामा भएको छ । सम्भावित जोखिमलाई मध्यनजर गरेर सडक र समुद्री किनारा बन्द गरिएको छ।

रिपोर्टका अनुसार, ओक्लाहोमा राज्यमा आइतबार राति सात वटा आँधी आएको थियो। त्यहाँको भिडियो फुटेजमा कारहरू पल्टिएको र घरका छानाहरू उडाएको देखिन्छ ।

उत्तरी टेक्सासको ओक्लाहोमाको सिमानामा हावाको गति १८३ किलोमिटर प्रतिघण्टा रेकर्ड गरिएको थियो। यो श्रेणी ३ को हरिकेन बराबर हो ।