काठमाडौं । नेकपा माओवादी केन्द्रले विना शर्त सुदूरपश्चिमका मुख्यमन्त्री कमलबहादुर शाहलाई विस्वासको मत दिने भएको छ ।

सत्ता संचालनमा लिखित सहमति बिना कांग्रेसका मुख्यमन्त्री कमलबहादुर शाहलाई विस्वासको मत नदिने निर्णयबाट माओवादी केन्द्र आज पछि हटेको हो ।

माओवादी केन्द्रका अध्यक्ष प्रचण्डले आज सुदूरपश्चिमका मुख्यमन्त्री कमलबहादुर शाहलाई विश्वासको मत दिन नेकपा माओवादी केन्द्रको संसदीय दललाई निर्देशन दिएको थिए ।
त्यसअघि हिजो माओवादी केन्द्रको प्रदेश संसदीय दलको बैठकले कांग्रेसले संवादको वातावरण नबनाएको र मुख्यमन्त्रीमा आलोपालोको विषयमा छलफल नभएको भन्दै यथास्थितिमा विश्वासको मत नदिने निर्णय गरेको थियो ।

पार्टीको स्पष्ट हैसियत विना कांग्रेसलाई विस्वासको मत दिदा पार्टीको सांगठानिक संरचनामा धक्का लाग्ने भन्दै प्रदेश संसदीय दलले कांग्रेससँग लिखित सम्झौताको प्रस्ताव गरेको थियो ।

तर कांग्रेस नेतृत्वको सुदूरपश्चिम सरकार जोगाउन माओवादी केन्द्रका अध्यक्ष पुष्पकमल दाहाल बढी चिन्तित भएपछि शर्तविनै माओवादी केन्द्रका सांसदहरुले विस्वासको मत दिने भएका हुन् ।

माओवादी केन्द्रले यसअघि एमालेसँग भएको सम्झौता जस्तै मुख्यमन्त्रीमा आलोपालो र मन्त्रालयको भागबन्डा प्याकेजमा हुनुपर्ने माग राखेको थियो ।

सुदूरपश्चिमका मुख्यमन्त्री शाहले विश्वासको मत लिनका लागि दिउँसो १ बजे प्रदेश सभा बैठक बोलाइएको छ ।

यसअघि नेकपा एमालेबाट मुख्यमन्त्री बनेका राजेन्द्र सिंह रावलले विश्वासको मत जुटाउन नसकेपछि पदमुक्त भएका थिए । त्यसपछि सुदूरपश्चिम प्रदेश सभाको ठूलो दलको हैसियतमा कांग्रेसका शाह २६ माघमा मुख्यमन्त्री नियुक्त भएका थिए । नेकपा एमालेले भने शाहलाई विश्वासको मत नदिने निर्णय गरिसकेको छ ।