काठमाडौं । कांग्रेसका उपसभापति धनराज गुरुङले नवनिर्वाचित राष्ट्रपति रामचन्द्र पौडेललाई सादकी जीवनशैली अपनाउन सल्लाह दिएका छन् ।

राष्ट्रपतिमा निर्वाचित भएपछि बुधबार पौडेललाई बधाई तथा शुभकामना दिने क्रममा सादगी जीवनयापन कायम राख्न तथा सवारीमा सर्वसाधारण जनतालाई दुःख नदिन सुझाव दिएका हुन् ।

‘महामहिमज्यूलाई (Simplicity) सादगी कायम गर्दै राष्ट्रपतिको सवारीमा तामझाम गरेर सर्वसाधारणलाई दुःख दिने विगतको परम्पराूलाई तोड्न सुझाव समेत दिइयो’, उनले सामाजिक सञ्जाल फेसबुकमा लेखेका छन् ।

आफूले दिएको सुझावप्रति राष्ट्रपति पौडेल प्रतिबद्ध भएको उनले उल्लेख गरेका छन् । निवर्तमान राष्ट्रपति विद्यादेवी भण्डारीले राजषी जीवनशैली अपनाएको तथा सवारीमा सर्वसाधारणलाई अनावश्यक दुःख दिएको भन्दै चौतर्फी आलोचना भएको थियो ।

राष्ट्रपतिको निर्वाचनको दिन मतदान गर्नुअघि गणतन्त्र नेपालको राष्ट्रपति कस्तो हुनेछ भनेर आफूले देखाउने पौडेलले सञ्चारकर्मीसँग प्रतिक्रिया दिएका थिए ।