काठमाडौं । पाकिस्तानका पूर्वप्रधानमन्त्री इमरान खान आज अदालतमा हाजिर हुने भएका छन् । तोशाखाना मुद्दामा उनी अदालतमा उपस्थित हुन लागेका हुन् ।

यस मुद्दामा उनीविरुद्ध गैरजमानती वारेन्ट जारी गर्दै मार्च १८ मा अदालतमा उपस्थित हुन भनिएको थियो ।

बिबिसीका अनुसार, यो मुद्दाको सुनुवाइ गर्ने ठाउँ परिवर्तन गरिएको छ । तेहरिक–ए–इन्साफ पार्टीका प्रमुखले आफ्नो सुरक्षाबारे चिन्ता व्यक्त गरेपछि त्यसलाई परिवर्तन गरेर न्यायिक कम्प्लेक्समा सारिएको छ ।

यसैबीच, इमरान खानलाई शुक्रबार लाहोर उच्च अदालतले नौ मुद्दामा सुरक्षात्मक जमानत पनि दिएको छ।

इमरान खानका वकिलले उनलाई १५ दिनको समय दिइएको खण्डमा सबै मुद्दामा उपस्थित हुन प्रयास गर्ने बताएका छन् ।