काठमाडौं । प्रधानमन्त्री पुष्पकमल दाहाल ‘प्रचण्ड’ ले आज प्रतिनिधिसभामा दोस्रो पटक विश्वासको मत लिँदैछन् ।

प्रचण्ड गत पुस १० मा नेकपा एमाले, राप्रपालगायत दलको समर्थनमा प्रधानमन्त्री नियुक्त भएका थिए । प्रचण्ड गठबन्धन बदलेर कांग्रेस, एकीकृत समाजवादीतिर फर्किएपछि ती दलले आफ्नो समर्थन फिर्ता लिएका थिए । संविधानको धारा १०० (२) को व्यवस्थाअनुसार, प्रचण्डले विश्वासको मत लिन लागेको हुन् । संविधानको धारा १०० (२) मा ७६ (२) बमोजिम गठन भएको सरकारले कुनै दलले समर्थन फिर्ता लिएको खण्डमा ३० दिनभित्र विश्वासको मत लिनुपर्ने व्यवस्था छ ।

दोस्रो पटक विश्वासको मत लिन कांग्रेस, राष्ट्रिय स्वतन्त्र पार्टी (रास्वपा), एकीकृत समाजवादी, जसपा, जनमत पार्टी, लोसपा, नाउपा, जनमोर्चा र आम जनता पार्टीले समर्थन गर्ने निश्चित छ । प्रतिनिधिसभामा कांग्रेससँग ८७, माओवादी केन्द्रसँग ३२, रास्वपासँग १९, जसपासँग १०, एकीकृत समाजवादीसँग १०, जनमतसँग ६, लोसपासँग ४, नाउपासँग ४, जनमोर्चा र आम जनता पार्टीसँग एक–एक जना सांसद छन् । स्वतन्त्र सांसदहरू अमरेशकुमार सिंह, योगेन्द्र मण्डलले पनि प्रचण्डलाई समर्थन गर्ने बताइएको छ ।

प्रचण्ड सुविधाजनक बहुमतमा रहे पनि उनको आफ्नै दल र गठबन्धनका सांसदको मत उनले पाउने छैनन् । त्यसमा माओवादी केन्द्रका सांसद वर्षमान पुन, कांग्रेसका सांसद चन्द्र भण्डारी र मनोरमा शेरचन छन् । स्वास्थ्यमा समस्या आएपछि यी तीनै जना उपचाररत छन् ।