काठमाडौं । राष्ट्रिय स्वतन्त्र पार्टी तत्काल प्रचण्ड नेतृत्वको सरकारमा सहभागी नहुने भएको छ ।

चैत ६ गते दोस्रोपटक प्रधानमन्त्री प्रचण्डलाई विश्वासको मत दिएको रास्वपाले उपनिर्वाचन अघि सरकारमा नजाने केन्द्रीय सदस्य दीपक बोहोराले जानकारी दिए ।

‘उपनिर्वाचनअघि हामी सरकारमा जादैनौं । निर्वाचनपछि सरकारमा जानेबारे निर्णय गर्नेछौं’, उनले भने ।

११ पुसमा तीन मन्त्री र एक राज्यमन्त्रीसहित प्रचण्ड नेतृत्वको सरकारमा रास्वपा सहभागी भएको थियो । तर नागरिकता प्रकरणमा सभापतिसमेत रहेका उपप्रधानमन्त्री तथा गृहमन्त्री रवि लामिछाने सर्वोच्च अदालतको फैसलाबाट पदमुक्त भएपछि ४२ दिनमै सरकारबाट बाहिरिएको थियो ।

चितवन–२ बाट पुनः उपनिर्वाचनमा उम्मेदवारी दिने तयारी गरेका रविले निर्वाचनपछि आफ्नै नेतृत्वमा सरकारमा जाने तयारी गरेका छन् । यसअघि गृहमन्त्रीसहित सरकारमा जान प्रधानमन्त्रीलाई निरन्तर दबाब दिएका थिए । स्वार्थ बाझिने मान्त्रालयमा रविलाई मन्त्री बनाउन प्रचण्डले नमाने पछि २३ माघमा रास्वपा सरकारबाट बाहिरिएको थियो ।