काठमाडौं । कांग्रेसको गढ मानिएको क्षेत्रमै आफ्ना उम्मेदवार पछाडि परेपछि कांग्रेस सभापति शेरबहादुर देउवाले मुख खोलेका छन् । उपनिर्वाचनको प्रारम्भिक मत परिणामतर्फ संकेत गर्दै उनले ठूला दलप्रति जनताले चासो नदेखाएकोमा चिन्ता व्यक्त गरे ।

सोमबार बसेको कांग्रेस संसदीय दलको बैठकमा देउवाको भनाई उद्दृत गर्दै पार्टीलाई सुधार्नुको विकल्प नभएको बताएको सांसद रामहरि खतिवडाले जानकारी दिए ।

‘उपनिर्वाचनले पनि ठूला पार्टीप्रति जनताको त्यत्ति चासो नभएको जस्तो छ भनेर केही कुरा राख्नुभयो । अझ पार्टीलाई सुधारेर जानुपर्ने आवश्यक्ता छ, त्यो सँगै काँग्रेसले बजेट ल्याउँदाखेरी जनतालाई सम्बोधन गर्ने खालका कार्यक्रम आउनुपर्छ, जनतासँग जोडिने खालका साना साना कार्यक्रम आउनुपर्छ’, उनले जानकारी दिए ।

बैठकमा धेरै सांसदहरूले कांग्रेसलाई अझै जनतासँग जोडेर लैजानुपर्नेमा जोड दिएका थिए । विगतमा कांग्रेस सरकारमा हुँदा जनपक्षीय काम गर्न नसकेकाले जनता निराश भएको हुनसक्नेतर्फ नेतृत्वको ध्यानकर्षर्ण गराउँदै आगामी दिनमा सच्चिएर जानुपर्ने धारणा राखेको खतिवडाले बताए । सांसदहरूले बोल्नेक्रम नसकिएकाले मंगलबार पुनः बस्ने खतिवडाले जानकारी दिए ।

तीन क्षेत्रका लागि भएको उपनिर्वाचनमा तनहुँ–१ मा कांग्रेसका उम्मेदवार भारी मतान्तरले पछाडि परेका छन् । चितवन–२ मा भर्खर मतगणना सुरू भएको भने बारा–२ मा उपेन्द्र यादवले सुरूवाती अग्रता लिएका छन् ।