काठमाडौं । अमेरिकामा फेरि अर्को बैंक पनि टाट पल्टिएको छ । सिलिकन भ्याली र सिग्नेचर बैंक धराशयी भएको दुई महिना नबित्दै त्यहाँको अर्को बैंक फस्ट रिपब्लिक बैंक टाट पल्टिएको हो।

अमेरिकाको बैंकहरूको नियमनकारी निकाय फेडेरल डिपोजिट इन्स्योरेन्स कर्पोरेसनले उक्त बैंक टाट पल्टिएको घोषणा गरेको छ ।

यो अमेरिकाको चौधौँ ठूलो बैंक हो । यसको कुल सम्पत्ति दुई सय ३३ अर्ब अमेरिकी डलर छ ।

यो बैंक केही समयदेखि लगातार संकटमा पर्दै गएको थियो । अमेरिकी सञ्चारमाध्यमका अनुसार, गत हप्ता मात्रै उक्त बैंकले पहिलो त्रैमासमा एक सय अर्ब डलर घाटा व्यहोर्नुपरेको थियो । परिणामतः यसको सेयरमा भारी गिरावट आयो । संकटमा परे पनि यो बैंक समाधानको ठोस उपाय अपनाउन भने चुक्यो ।

बैंक टाट पल्टिएपछि अमेरिकाको फेडेरल सरकारले एफडिआइसीसँग यसबारे छलफल थालेको छ । एफडिआइसीले बैंकका ग्राहकको डिपोजिटलाई ग्यारेन्टी दिने गर्छ ।

अमेरिकाका बैंकहरू पछिल्लो समय संकटमा पर्दै गइरहेका छन् । यसअघि दुई बैंक टाट पल्टिएपछि त्यसको प्रभाव अमेरिकाभित्र मात्र नभएर विश्वव्यापी परिरहेको छ ।