काठमाडौं । संघीय संसदले सांसदहरूको हाजिरी विद्युतीय प्रणालीबाट गर्ने भएको छ ।

त्यसका लागि आजबाट सांसदहरूको ‘बायोमेट्रिक’ संकलन गर्ने काम सुरू भइसकेको छ । प्रतिनिधिसभा सचिवालयका सहायक प्रवक्ता दशरध धमलाका अनुसार आजदेखि जेठ १२ गतेसम्म स्याम्पल लिने काम हुनेछ ।

उनका अनुसार संसदहरूले विहान ११ देखि ३ बजेसम्म आफ्नो बायोमेट्रिक्स उपलब्ध गराउन सक्नेछन् । ‘स्याम्पल दिइसकेपछि केही समय परीक्षणमा राखेर हेरिन्छ । समस्या आएमा त्यसको समाधान गरिन्छ र प्रविधिले काम गर्न थालेपछि प्रयोगमा जान्छ,’ उनले भने ।

सदनको बैठकमा सांसदहरू हाजिर गरेर घर जाने गरेको प्रवृत्तिलाई रोक्नका लागि यस्तो किसिमको ‘रियल टाइम’ हाजिरीको व्यवस्था गरिएको हो ।

अहिलेसम्म सांसदहरूले लिखित रूपमै हाजिरी गर्दै आएका थिए ।