काठमाडौं । देशकै प्रशासनिक केन्द्र सिंहदरबारका कर्मचारीहरू कार्यालय समयमा हाजिर गर्ने र टाप कस्ने गरेको गुनासो बढेपछि राष्ट्रिय सतर्कता केन्द्रले दक्षिण गेटमै छड्के हानेको छ ।

नेपाल प्रहरी र राष्ट्रिय सतर्कता प्रहरीले संयुक्त रूपमा आज अनुगमन गरिरहेका छन् । केन्द्रका प्रहरी नायब महानिरिक्षक निरञ्जन विष्टले आज दिउँसभरी यो अनुगमन जारी हुने जानकारी दिए ।

‘कर्मचारीहरू हाजिर गरेर बाहिर निस्किने, कार्यालयको काम भन्दापनि निजी कामले बाहिर निस्किने कर्मचारीको विवरण लिने काम भइरहेको छ,’ उनले भने, ‘पत्रपत्रिकामा आएको समाचार र केन्द्रमै पनि गुनासो आएपछि अनुगमन गरेका हौं ।’

केन्द्रले हिजो पनि कार्यालय समयमा क्यान्टिनमा बसेर समय बिताउने कर्मचारीमाथि अनुगमन गरेको थियो । सो क्रममा काम गर्नुपर्ने समयमा क्यान्टिनमा गफ गरेर बस्ने १२ जना कर्मचारीको विवरण संकलन गरिएको छ । उनीहरूलाई गर्नुपर्ने कारवाहीको मागसहितको विस्तृत प्रतिवेदन बनाएर सचिवलाई बुझाउने तयारी रहेको डिआइजी विष्टले जानकारी दिए ।

‘कार्यालय समयमा दिनभरी क्यान्टिनमा गफ चुटेर बस्ने, अन्य डिल गर्ने गुनासो आएपछि हामीले अनुगमन गरेका थियौं,’ उनले भने, ‘सो क्रममा भेटिएका १२ जना कर्मचारीलाई कारवाहीको दायरामा ल्याउने तयारीमा छौं ।’