काठमाडौं । प्रधानमन्त्री पुष्पकमल दाहाल ‘प्रचण्ड’ र नेकपाका महासचिव नेत्रविक्रम चन्द ‘विप्लव’बीच भेटवार्ता भएको छ । चार दल सम्मिलित समाजवादी मोर्चा गठनको केही दिनपछि दुई नेताबीच भेटवार्ता भएको हो ।

प्रधानमन्त्री प्रचण्डको सचिवालयले समाजवादी मोर्चालाई प्रभावकारी बनाउनेबारे दुईबीच बिहीबार बिहान छलफल भएको जनाएको छ । जनयुद्धका यी सहकर्मीबीच माओवादी आन्दोलनको उपलब्धि रक्षा र पार्टी एकताबारे पनि गम्भीर छलफल भएको प्रचण्डकी स्वकीय सचिव गंगा दाहालले जानकारी दिइन् ।

‘समाजवादी मोर्चालाई कसरी प्रभावकारी बनाउने र माओवादी आन्दोलनको उपलब्धिको रक्षा र पार्टी एकताबारे गम्भीर छलफल भएको छ,’ दाहालले सामाजिक सञ्जालमा लेखेकी छन् ।

प्रचण्डको नेतृत्वमा ०५२ देखि १० वर्षसम्म सञ्चालित जनयुद्धमा महत्त्वपूर्ण भूमिका निर्वाह गरेका विप्लव शान्ति प्रक्रियापछि मूल नेतृत्वले धोका दिएको आरोप लगाउँदै अलग पार्टी खोलेर क्रियाशील भएका थिए । हिंसात्मक गतिविधि गरेपछि बीचमा उनको पार्टीमाथि सरकारले प्रतिबन्धसमेत लगाएको थियो । प्रतिबन्ध फुकुवापछि मूलधारको राजनीतिमा फर्किएका विप्लव क्रान्ति र विद्रोहका नारा छाडेर नरम देखिन थालेका छन् ।