काठमाडौं । काठमाडौं महानगरपालिकाका मेयर बालेन्द्र शाहले भारतीय फिल्म रोक्न उच्च अदालतले दिएको आदेश नमान्ने बताएका छन् ।

हिन्दी फिल्म चल्न नदिने काठमाडौं महानगरको निर्णयविरूद्ध चलचित्र संघले हालेको रिटमा उच्च अदालत पाटनले बिहीबार अन्तरिम आदेश दिएको थियो । सोही आदेश अवज्ञा गर्ने उनले सामाजिक सञ्जाल फेसबुकबाट जानकारी गराएका हुन् ।

‘जहाँ सवाल देशको सार्वभौमिकता र स्वाधीनताको आउँछ म कुनै कानुन र अदालतलाई मान्नेवाला छैन ।फिल्म लेखकले नेपाल भारतको अधिनमा थियो भनी सकेपछि उनिहरुको नियत थाहा हुन्छ’, उनले लेखेका छन्, ‘यो कुरालाई नेपाल सरकारले  स्टन्ट भन्नू र अदालतले फिल्म चल्न दिनु भनेको नेपाल भारतको अधिनमा थियो , अदालत र सरकार भारत को गुलाम भएको बुजिन्छ  ।’

उनले अदालतको अवज्ञा गर्दा जुन सुकै सजाय भोग्न तयार छु तर फिल्म चल्दैन र चल्न नदिइने अडान लिएका छन् । मेयर बालेन शाह, नगर प्रहरी, गृह मन्त्रालय र सञ्चार, सूचना तथा प्रविधि मन्त्रालयलाई विपक्षी बनाएर संघले मुद्दा दायर गरेको थियो ।