काठमाडौं। अमेरिकाका पुर्व राष्ट्रपति डोनाल्ड ट्रम्पमाथि आपराधिक अभियोग दर्ता भएको छ ।

अमेरिकी संसद क्यापिटल हिलमा तोडफोड भएको मामिलामा ट्रम्पमाथि आपराधिक अभियोग दर्ता भएको हो । उनलाई सन् २०२० मा भएको राष्ट्रपतीय निर्वाचनको मतपरिणाम उल्ट्याउने खेलमा लागिपरेको अभियोग लागेको हो ।

यससँगै पाँच महिनाको अन्तरालमा ट्रम्पमाथि तेस्रोपटक आपराधिक मुद्दा लागेको छ । उनीविरुद्ध राज्यलाई धोका दिने षड्यन्त्र रचेको, साक्षीलाई प्रभावित पारेको र नागरिक अधिकारविरुद्ध रणनीति बनाएको आरोप लगाइएको छ ।

तर राष्ट्रपति पदका लागि पुनः उम्मेदवारी दिन लागेका ७७ वर्षीय ट्रम्पले गलत कार्य गरेको आरोप भने अस्वीकार गरेका छन् । निर्वाचनसम्बन्धी अनुसन्धान उनको पराजय र वाशिङ्टन डीसीमा भएको दङ्गाबीचको दुई महिनाको अवधिमा ट्रम्पले गरेका कार्यहरूमा केन्द्रित छ ।

त्यतिबेला डेमोक्र्याटिक पार्टीबाट निर्वाचित राष्ट्रपति जो बाइडनको जितलाई सांसदहरूले प्रमाणीकरण गरेपछि ट्रम्पका समर्थकहरूले संसद् भवनमा आक्रमण गरेका थिए ।
यस मामिलामा सुनुवाइका लागि ट्रम्प अगस्ट ३ मा वासिङ्टनको फेडेरल कोर्ट हाउसमा पेस हुनेछन् । अमेरिकी चुनावको नतिजा प्रभावित गर्न ट्रम्पले भूमिका खेलेको आरोपलाई अमेरिकी न्याय विभागले अनुसन्धान गरिरहेको छ ।

न्याय विभागका विशेष सल्लाहकार ज्याक स्मिथले ४५ पृष्ठको आरोपपत्र दायर गरेका छन् । ट्रम्पले देशलाई धोखा दिएको पुष्टि भए ट्रम्प २० वर्ष र अमेरिकी नागरिकको अधिकार प्रभावित गर्न खाजेको विषयमा ट्रम्पलाई १० वर्षको जेल सजाय हुन सक्छ ।