काठमाडौं । राष्ट्रपति रामचन्द्र पौडेलले सर्वदलीय बैठक बोलाउने तयारी गरेका छन् । दलहरुबीच सहमति जुट्ने सम्भावना नदेखेपछि राष्ट्रपति पौडेलले सर्वदलीय बैठक बोलाउने तयारी गरेका हुन् ।

स्रोतका अनुसार राष्ट्रप्रमुखको हैसियतमा राष्ट्रपतिको जिम्मेवारी अन्तर्गत सर्वदलीय बैठक बोलाउने तयारी भएको हो ।

‘राष्ट्रपतिमा निर्वाचित भएपछि सबै दलका नेतासँग भेट्ने अवसर पनि जुरेको छैन। निर्वाचित भए लगत्तै उहाँ बिरामी हुनु भयो । अब सबै दलका नेतासँग भेट गर्ने र संसदको गतिरोध अन्त्य गर्ने विषयमा पनि सहजीकरणको प्रयास हुन्छ।’ स्रोतले बतायो ।

राष्ट्रपति पौडेलले राजनीतिक दलका नेताहरुको अनुकुल समय हेरेर छिटै बैठक बोलाउने तयारी गरेका छन् । यसबारे अन्य दलहरूले पनि आफ्नो तर्फतबाट तयारी गरिरहेका छन् ।

आज बिहीवार पूर्वनिर्धारित कार्यक्रम अनुसार दुई देशका राजदुतको ओहोदाको प्रमाणपत्र बुझाउने तय रहेकाले आज सर्वदलिय बैठक नभएको हो ।

सर्वदलिय बैठकका बारेमा राष्ट्रपति पौडेलले प्रधानमन्त्री, विपक्षी दलका नेता र कांग्रेस सभापतिसँग छलफल गरिसकेका छन् ।