काठमाडौं । नेकपा एमालेका अध्यक्ष केपी शर्मा ओलीले नेकपा माओवादी केन्द्रले नराम्रा बाहेक अन्य कुनै काम नगरेको आरोप लगाएका छन् ।

पार्टी कार्यालयमा आयोजित पार्टी प्रवेश कार्यक्रमलाई सम्बोधन गर्दै ओलीले माओवादीमा छोरी ज्वाइँ, भाइ भतिजा भान्जा मात्रै सप्रेको र नेता कार्यकर्ता पीडित भएर तड्पिएको टिप्पणी गरे ।

त्यसक्रममा ओलीले माओवादीका नेता कार्यकर्ताले आफूसँग पिडा पोख्ने गरेको सुनाए । ओलीले कांग्रेस पुरानो भएकोसमेत टिप्पणी गर्दै माओवादीको पछाडि लागेको देखेर आफूलाई अचम्म लागेको बताए ।

‘कांग्रेस र हामी सँगसँगैको पार्टी हौं । तर, कांग्रेस साँच्चै पुरानो भयो । केही पनि गर्न नसक्ने,’ ओलीले भने, ‘८७ सीट छ तर ३२ सीटको पछाडि लुरुलुरु लागेको छ । निरीह भएको छ । आफूसँग कति सीट छ पनि चाल पाउँदैनन् ।’